श्री दत्त देवस्थान ट्रस्टच्या नवीन वेबसाइटवर आपले सर्वांचे स्वागत आहे

परमपूज्य गुरुदेव श्री रामकृष्ण क्षीरसागर स्वामी महाराज ह्यांनी सन १९७४ मध्ये स्थापना केलेल्या श्री दत्त देवस्थान ट्रस्ट (सार्वजनिक न्यास नोंदणी क्रमांक A - ७११, अहमदनगर) तर्फे सुरुवातीपासूनच अनेक धार्मिक व सामाजिक उपक्रम अखंडपणे चालविले जात आहेत.

श्री दत्तावतारी परमपूज्य सद्गुरू श्री रामकृष्ण क्षीरसागर स्वामी महाराज ह्यांनी घालून दिलेल्या घडीप्रमाणे व त्यांनी सांगितलेल्या परंपरेप्रमाणे नवीन विश्वस्त मंडळातर्फे आता ह्या ट्रस्टचा कारभार चालविण्यास सुरुवात करण्यात आली आहे. नवीन विश्वस्त मंडळाची ओळख 'विश्वस्त मंडळ' ह्या पेजवर आपल्याला करून घेता येईल.

मध्यंतरीच्या काळात सर्वसामान्य भक्तांनी न्यासाच्या व्यवस्थापन विषयक समस्यांकडे केलेल्या दुर्लक्ष्यामुळे श्री दत्त देवस्थान ट्रस्टच्या विश्वस्त मंडळात बाह्य शक्तींनी हस्तक्षेप करून व दबावतंत्राचा आणि कायद्यातील त्रुटींचा वापर करून ट्रस्टचे लीगल कन्सल्टंट, मॅनेजर इत्यादी लोकांनाच विश्वस्तपदी नेमल्याचे भासवून ह्या ट्रस्टच्या कारभारात ढवळाढवळ करण्याचा आणि दहशत माजविण्याचा अयशस्वी प्रयत्न केला होता आणि त्यामुळे ट्रस्टची वाटचाल आणि ट्रस्टच्या प्रगतीची गती मंदावली होती, अनेक आर्थिक गैरव्यवहार उजेडात आले होते व भक्तांच्याकडे पूर्णतः दुर्लक्ष झाले होते.

मात्र, आता जागृत भक्तांनी ह्या परिस्थितीवर नियंत्रण मिळविले असून परमपूज्य गुरुदेवांना अपेक्षित असलेल्या मार्गाने आता श्री दत्त देवस्थान ट्रस्ट मार्गक्रमणा करू लागलेला आहे. तसेच, गैरवर्तन करणारे ट्रस्टचे कर्मचारी, आपली संवैधानिक जबाबदारी पार पाडण्यास टाळाटाळ करणारे सनदी लेखापाल, तोतये विश्वस्त, आर्थिक गैरव्यवहारांना आणि बेकायदेशीर निधीसंकलनाला उत्तेजन देणारे तथाकथित भक्त आणि रजिस्टर्ड व अन-रजिस्टर्ड सत्संग मंडळे, आदींवर योग्य ती कायदेशीर कारवाई आणि न्यायिक इलाज ह्या नवीन विश्वस्त मंडळाने ह्यापूर्वीच सुरु केला आहे.

आपल्या माहितीसाठी नवीन विश्वस्त मंडळाच्या नेमणुकीच्या बाबतीतली माहिती व श्री दत्त देवस्थान ट्रस्टच्या बाबतीतल्या सध्याच्या न्यायालयीन परिस्थितीचा संपूर्ण आढावा आणि मागोवा ह्या वेबसाईटवर 'न्यायालयीन लढा' ह्या वेबपेजवर उपलब्ध करून देण्यात आलेला आहे.

मागील काळात ह्या ट्रस्टवर ओढविलेली परिस्थिती पुन्हा नव्याने निर्माण केली जाऊ नये ह्यासाठी भक्तांनी जागरूक राहून ट्रस्टच्या व्यवस्थापनावर संपूर्ण लक्ष ठेऊन असले पाहिजे.

तसेच, पूर्वीच्या चुका टाळून नव्याने सुरुवात करण्यासाठी व कायदेशीर पळवाटा बुजवून टाकण्यासाठी विश्वस्त मंडळातर्फे हरसंभव प्रयत्न सुरु करण्यात आले असून त्यात भक्तांनी स्वयंसेवक म्हणून सहभागी होण्याचे आवाहन ह्या वेबसाईटच्या माध्यमातून ट्रस्टच्या नवीन विश्वस्त मंडळातर्फे सर्वांना करण्यात येत आहे.

वेबसाईट किंवा इतर तत्सम दुय्यम उद्दिष्टांच्या विकासावर सध्याच्या विश्वस्त मंडळाचा आत्ता भर नसून त्या ऐवजी भक्तांसाठी मूलभूत सोयीसुविधा आणि पारदर्शी व्यवस्थापनाची निर्मिती ह्यावरच विश्वस्त मंडळाने आपले संपूर्ण लक्ष केंद्रित केले आहे.

स्वयंसेवक म्हणून श्री दत्त देवस्थान ट्रस्टच्या उद्दिष्टांना साहाय्यकारी स्वरूपाचे कार्य करू इच्छिणाऱ्या भक्त कार्यकर्त्यांसाठी सेवेच्या अनेक संधी इथे उपलब्ध आहेत.

परमपूज्य गुरुदेवांचे ज्येष्ठ भक्त श्री मुरलीधर एकनाथ ऋषीपाठक ह्यांच्या अनुभवी नेतृत्वाखाली अनेक भक्त कार्यकर्त्यांनी व त्यांच्या त्यांच्या संलग्न सत्संग मंडळांनी मोठ्या सेवाभावी वृत्तीने गुरुदेवांच्या भक्तांसाठी 'श्रीरामकृष्ण सेवाश्रम' ह्या उपक्रमास सुरुवात केली असून दर्शनासाठी येणाऱ्या भक्तांना मूलभूत सेवासुविधा उपलब्ध करून देण्यासाठी ह्या सर्वांचे अव्याहत प्रयत्न सुरु आहेत. ह्या उपक्रमाची माहिती 'श्रीरामकृष्ण सेवाश्रम' ह्या वेबपेजवर दिलेली आहे.

तसेच, ज्या कार्यकर्त्या भक्तांना ट्रस्टच्या व्यवस्थापन विषयक कार्यात काम करण्यात रस असेल, ज्यांना सर्व कायदेशीर बाबी समजून घेऊन ट्रस्टला साहाय्य करायचे असेल त्यांनी देखील विश्वस्त मंडळाशी जरूर संपर्क साधावा.  

ह्या मोठ्या मोहिमेत सर्व लहान-थोर गुरुभक्तांचे स्वागत आहे आणि त्यांना विनम्र आवाहन आहे की त्यांनी समर्पित भावनेने ह्या कार्यासाठी  स्वतःला वाहून घेण्याचे कष्ट करावेत.

ट्रस्टच्या मंजूर योजनेमध्ये उपसमिती स्थापन करण्याचे अधिकार विश्वस्त मंडळाला असून त्या माध्यमातून स्वयंसेवक भक्त ह्या ट्रस्टच्या हितासाठी थेटपणे कार्य करू शकतात.  त्यासाठी विश्वस्त मंडळाशी आपण कधीही संपर्क साधू शकता. ह्या वेबसाईटच्या 'संपर्क' ह्या वेब पेजवर संपर्कांसाठीची साधने आणि माध्यमे ह्यांची माहिती उपलब्ध करून देण्यात आलेली आहे.

धन्यवाद.

आपले विश्वासू, 

विश्वस्त मंडळ, श्री दत्त देवस्थान ट्रस्ट (सार्वजनिक न्यास नोंदणी क्रमांक A - ७११, अहमदनगर)